Системийн инженерчлэлийн институт нь "хүн төвтэй" буюу гэр бүл, сургууль, эмнэлэг, нийгэм гэх мэт хүнээс бүрдсэн, тодорхой зорилготой үйл ажиллагааг явуулдаг системүүдийн үйл ажиллагааны загварыг боловсруулах, үйл ажиллагааг нь зохицуулж байгаа дүрэм, журмуудыг шинжлэх, оношлох гэх мэт чанарын судалгааг түлхүү гүйцэтгэдэг. Мөн харилцаанд өдөр тутам хэрэглэгддэг боловч хүн бүр өөр, өөрийн өнцгөөс тайлбарлах, улмаар зөрчилдөөнүүдийг үүсгэх боломжтой нэр томьёонуудын тодорхойлолтыг боловсруулах ажлыг хийдэг.

Судалгааны аргын хувьд "ТУС Солюшн" компанийн боловсруулсан "Нийгмийн системийн инженерчлэлийн суурь онол, зарчим" дээр суурилсан аргачлалуудыг ашигладаг. Одоогийн байдлаар 30 орчим оюуны шийдлийг судалгаа хөгжүүлэлтийн ажилд идэвхтэй ашиглаж байна. Судалгаа гүйцэтгэх процессын хувьд судлаачид өөрсдийн хариуцан авсан даалгаврыг гүйцэтгэн түүнийг нэгдсэн судалгааны багаар, цаашлаад зөвлөхүүдтэй хэлэлцүүлэх, сайжруулах зарчмаар ажилладаг.

2018 оноос хойш бидэнтэй хамтран ажилласан 280 орчим судлаачдаас сонгон шалгаруулалт хийн "Хөгжүүлэгч гишүүд"-ийг бүрдүүлсэн байгаа бөгөөд судалгааны багийн нийт нөөцийн 70 орчим хувийг эдгээр гишүүд эзэлдэг. Үлдсэн 30 орчим хувийг нээлттэй сонгон шалгаруулалт хийн авдаг бөгөөд тодорхой чиглэлээр магистр болон түүнээс дээш зэрэгтэй байхыг шаарддаг. Нээлттэй сонгон шалгаруулалт хийж анкетын шат, тестийн шат, ярилцлагын шат гэсэн 3 шалгуурыг хангасан судлаачид судалгааны багт гэрээ байгуулан ажилладаг.

Багш нартай судалгаанд тодорхой чиглэлээр хамтран ажиллах, оюутнуудыг системийн инженерчлэлийн аргад суралцуулах, дадлагажигч оюутны хөтөлбөр хэрэгжүүлэх зэргээр Их сургуулиудтай хамтын ажиллагаатай байдаг. Та манай байгууллагатай холбогдон суралцаж буй сургууль нь бидэнтэй албан ёсоор хамтын ажиллагаатай эсэхийг лавлах эсвэл хувь оюутны зүгээс бидэнд санал тавин хамтрах бүрэн боломжтой.

Хувь хүн болон байгууллага руу чиглэсэн сургалтуудыг зохион байгуулдаг. Судалгааны ажлаар бий болсон мэдлэг дээр суурилан сургалтын хөтөлбөрийг боловсруулдаг тул цэгцтэй, тодорхой үндэслэлтэй, бодитоор хэрэгжүүлэх боломжтой агуулгуудыг санал болгодог.

Хувь гишүүдийн хувьд Залуу судлаач гишүүн, Дэмжигч гишүүн, Хөгжүүлэгч гишүүн, Бүтээгч гишүүн, Түгээн дэлгэрүүлэгч гишүүн гэсэн ангилалтай байдаг. Хөгжүүлэгч, Бүтээгч, Түгээн дэлгэрүүлэгч гишүүн болохын тулд бидэнтэй өмнө нь үр дүнтэй хамтран ажилласан байх шалгуурыг тавьдаг бол Залуу судлаач гишүүн, Дэмжигч гишүүдийн хувьд тухайлсан нарийн шалгуур байхгүй. Та манайд хүсэлтэй илгээхэд хангалттай.